දුමින්ද බලන්න ආ විශාල පිරිසක් හරවා යවලා

මරණ දණ්ඩනය නියම වූ හිටපු පාර්ලිමේන්තු මන්ත්‍රී දුමින්ද සිල්වා මහතා බැලීම සඳහා වැලිකඩ

බන්ධනාගාරයට පැමිණි විශාල පිරිසක් නැවත හරවා යැවීමට බන්ධනාගාර පාලන අධිකාරිය කටයුතු කර තිබේ.

මරණ දණ්ඩනය හිමි වූවකු බැලීම සඳහා ඥාතිවරයකුට හෝ මිතුරකුට අවසර හිමිවනුයේ සතියකට එක් දිනකි.

මහින්ද කතරගම ආගමික වතාවත්වල

හිටපු ජනාධිපති මහින්ද රාජපක්‍ෂ මහතා පෙරේදා (11 වැනිදා) රාත්‍රියේ විශේෂ ආගමික වතාවත් කිහිපයකට එක්‌වීමට කතරගම පුදබිම වෙත පැමිණ සිටියේය.

ප්‍රථමයෙන් කිරිවෙහෙර වැඳපුදා ගත් හිටපු ජනාධිපතිවරයා පසුව දේවාල භූමියට පැමිණ අෂ්ඨඵල බෝධියේ ආශිර්වාදය ලබා ගත්තේය.

ඒකාබද්ධ විපක්‍ෂයට තවත් පක්‌ෂ 7ක්‌

ඒකාබද්ධ විපක්‍ෂය ප්‍රධානත්වයෙන් ගොඩනඟන ආණ්‌ඩු විරෝධී ජනතා බලවේගය සමග එක්‌ව ඉදිරියේදී කටයුතු කිරීමට තවත් දේශපාලන පක්‍ෂ 7 කට වැඩි ප්‍රමාණයක්‌ එකඟතාව පළකර තිබේ.

හිටපු ඇමැති බැසිල් රාජපක්‍ෂ මහතා පසුගිය දිනවල එම පක්‍ෂ ප්‍රධානීන් සමග කළ සාකච්ඡාවලින් අනතුරුව මෙම එකඟතාවට පැමිණ ඇත.

දිනුවොත් වැඩි ගාණක්‌ දෙන ක්‍රිකට්‌ කොන්ත්‍රාත්තුවක්‌ එයි

ජාතික ක්‍රිකට්‌ කණ්‌ඩායමේ ක්‍රීඩකයන් කොන්ත්‍රාත් ගත කිරීමේදී උපරිමය 35 කට ආසන්න සංඛ්‍යාවක්‌ පමණක්‌ තෝරා ගැනීමට නියමිතව තිබේ. ඒ අනූව අදාළ ක්‍රීඩකයන් සංඛ්‍යාව කාණ්‌ඩ තුනක්‌ යටතේ ඉදිරි සති තුන ඇතුළත වාර්ෂික කොන්ත්‍රාත්තුවකට ඇතුළත් කිරීමට නියමිතය. කොන්ත්‍රාත්තුවට ඇතුළත් වන ක්‍රීඩකයන්ට දිනන විට වැඩි මුදලක්‌ එන ක්‍රමයක්‌ ශ්‍රී ලංකා ක්‍රිකට්‌ ආයතනය සකස්‌ කර තිබීම විශේෂත්වයකි.

නව ක්‍රිකට්‌ පරිපාලනය පැමිණීමෙන් පසුව මෙතෙක්‌ වාර්ෂික කොන්ත්‍රාත්තුවක්‌ ක්‍රිකට්‌ ක්‍රීඩකයන්ට ලබා නොදී තිබෙන නමුත් ඉදිරි සති දෙක තුන ඇතුළතදී ක්‍රමවත් කොන්ත්‍රාත්තුවක්‌ සඳහා ක්‍රීඩකයන් පිරිසක්‌ තෝරා ගන්නා බව ශ්‍රී ලංකා ක්‍රිකට්‌ සභාපති තිලංග සුමතිපාල මහතා පැවසීය.

මේජර් විමල්ගේ දඩය ගෙවන්න ඒකාබද්ධ විපක්ෂය ඉදිරිපත් වෙයි

වසර 18කට පෙර ක්‍රියාන්විතයේ යෙදී සිටියදී කදවුරකින් පැන ගිය එල්ටීටීඊ සාමාජිකයකුට වෙඩි තබා ඝාතනය කිරීමේ සිද්ධියට වරදකරු වූ යුද හමුදා මේජර් විමල් වික්‍රමගේට එම එල්ටීටීඊ සාමාජිකයාගේ ඥාතීන් වෙත ගෙවීමට අධිකරණයෙන් නියමවූ රුපියල් ලක්ෂ 20ක වන්දි මුදල ගෙවා දැමීමට ඒකාබද්ධ විපක්ෂයේ ක්‍රියාකාරි කමිටුව ඉදිරිපත්ව සිටී.

ඒ අනුව අද (13දා) උදෑසන 7ට හෝමාගම නගරයේ ධර්මපාල පිළිරුව අසලින් එම වන්දි මුදල එක්රැස් කිරීමේ කාර්යය ආරම්භ කිරීමට කටයුතු යොදා තිබේ.