තාජුඩීන් සිදුවීම පමණක් නිරීක්ෂකයන් නැතිව තීන්දු කරලා

2012 වසරේ මැයි මස සිට මේ දක්වා මාරක රිය අනතුරු තුන්දහසකට ආසන්න ප්‍රමාණයක් සිදුව ඇති අතර එම අනතුරු අතරින් මෝටර් රථ ප්‍රවාහන දෙපාර්තමේන්තුවේ නිරීක්ෂකයන් කැඳවා නැති එකම රිය අනතුර 2012 මැයි 17 දින සිදුවූ ප්‍රසිද්ධ රගර් ක්‍රීඩක වසීම් තාජුඩීන්ගේ මරණයට අදාළ අනතුර බව අනාවරණය වේ.

නාරාහේන්පිට ශාලිකා ක්‍රීඩාංගණය අසල එම අනතුර සිදුවී තිබුණි. වසීම් තාජුඩීන්ගේ මරණය පසුව ඝාතනයක් බව රහස් පොලිසිය මගින් හෙළිකර ගනු ලැබුවත් 2012 එම සිද්ධිය සම්බන්ධ‍ව පරීක්ෂණ පැවැත්වූ පොලිසිය තීරණය කර තිබුණේ තාජුඩීන්ගේ මරණය මාරක රිය අනතුරකින් සිදුවූ මරණයක් බවයි.

හනුමන් පාලමක් හදන්නේ නෑ

වත්මන් රජයේ සංවර්ධන ක්‍රියාවලිය හමුවේ පාද යාත්‍රා ගොස් පොල් ගසා ඇතිවී, පැරදී, සිරවී සිටින මන්ත්‍රීවරුන් කරකියා ගත නොහැකිව ජාතිවාදය වපුරමින් සිටින බව අගමැති රනිල් වික්‍රමසිංහ මහතා පාර්ලිමේන්තුවේ දී ඊයේ (10) පැවැසීය. කුරුණෑගල පැවැත්වෙන ශ්‍රී ලංකා නිදහස් පක්ෂයේ සම්මේලනයට මහින්ද රාජපක්ෂ මන්ත්‍රීවරයා ගියොත් මේ පිරිස තවත් අගාධයට පත්වන බව ද අගමැතිවරයා පැවැසීය.

මෙලෙස විවිධ විරෝධතා දක්වන මෙම පිරිස මිහිදු මහ රහතන් වහන්සේ සිටි කාලයේ සිටියේ නම් ඉන්දියානු ජාතිකයෙක් කියා මිහිදු මහ රහතන් වහන්සේ ද පළවා හරින බව ද සඳහන් කළේය.

විස එන්නත් දුන්නා දැයි පරීක්ෂණ කිරීමට සූදානම්

එල්.ටී.ටී.ඊ කොටි සාමාජිකයන්, පුනරුත්ථාපන ලබමින් සිටිය දී විස සහිත එන්නත් ලබා දුන්නේ යැයි පුනරුත්ථාපනය ලැබූවන් කරන චෝදනා සම්බන්ධයෙන් පරික්ෂණයක් සිදුකිරීමට සුදානම් බවසෞඛ්‍ය, පෝෂණ හා දේශීය වෛද්‍ය ඇමැති, සම කැබිනට් ප්‍රකාශක වෛද්‍ය රාජිත සේනාරත්න මහතා පැවැසීය. 

මේ සම්බන්ධයෙන් උතුරු පළාත් සංවර්ධන කමිටු රැස්වීමේ දී ද අදහස් පළ වූ බව කී ඇමැතිවරයා, මේ සම්බන්ධයෙන් මධ්‍යම ආණ්ඩුවට නිසි වාර්තාවක් ඉදිරිපත් කරන ලෙස එම පළාත් පාලන නියෝජිතයන්ට දැනුම් දුන් බව ද කීය.

අමතර කොටස් අතර සඟවා ගෙනා ප්‍රාඩෝ රිය

රුපියල් කෝටි 03ක (ලක්ෂ 300) වටිනාකමින් යුත් ප්‍රාඩෝ වර්ගයේ අධි සුඛෝපභෝගී වාහනයක් හා කොටස් කළ තවත් වෑන් රථ තුනක් ඊයේ (10) රේගු නිවාරණ අංශය මගින් අත්අඩංගුවට ගෙන ඇත.

කුරුණෑගල ප්‍රදේශයේ වාහන අමතර කොටස් ආනයනය කරන ව්‍යාපාරිකයකු ජපානයේ සිට නීති විරෝධී අයුරින් මෙම වාහන ගෙන්වා ඇතැයි රේගු මාධ්‍ය ප්‍රකාශක, රේගු අධ්‍යක්ෂ ධර්මසේන කහඳව මහතා පැවැසීය. ඉකුත් මැයි මස 27 වැනි දින ජපානයේ සිට පැමිණි 'කොරින්තියාකොස්' නමැති නෞකාවේ සිට ගෙන්වන ලද මෙම වාහන අතර, සුසූකි ඊවරි වෑන් රථයක්, නිසාන් වැනට් වෑන් රථයක් හා තවත් නිසාන් වෑන් රථයක් බහාලුමේ සඟවා මෙරටට ගෙන්වා තිබිණි. මාස දෙකක පමණ කාලයක් ග්රෑන්ඩ්පාස් හි 'ග්රේ ලයින්' 2 බහාලුම් පර්යන්තයේ රඳවා තබාගෙන පරීක්ෂණ කළ රේගු නිවාරණ අංශ නිලධාරීහු ඊයේ (10) මාධ්‍ය ඉදිරියේ මෙම කන්ටේනර් බහාලුම විවෘත කළහ.

වෙලේ සුදාගේ බිරිය-මව ඇතුළු 4කට ඇප

හෙරොයින් ජාවාරම් කිරීම ඇතුළු නීති විරෝධී ක්‍රම මඟින් අයථා ලෙස මුදල් සහ දේපළ උපයා ගැනීම සම්බන්ධයෙන් මුදල් විශුද්ධිකරණය වැළැක්වීමේ පනත යටතේ රහස් පොලිසිය විසින් අත්අඩංගුවට ගත් දැනට මරණ දඬුවම නියම වී සිටින සමන්ත කුමාර හෙවත් වෙලේ සුදාගේ බිරිය, මව ඇතුළු සැකකාරියන් 04 දෙනකු එක් අයකුට රුපියල් 10,000ක මුදල් සහ රුපියල් ලක්‍ෂ 05 බැගින් ශරීර ඇප 02 බැගින් මුදා හරින ලෙස කොළඹ අතිරේක මහෙස්ත්‍රාත් නිශාන්ත පීරිස් මහතා පෙරේදා (09දා) නියෝග කළේය.