28දා පාද යාත්‍රාව: බැසිල් සාකච්ඡාවක

මහනුවරින් මෙම මස 28 දින ආරම්භ කිරීමට නියමිත ජන සටනට පණ පොවන පාද යාත්‍රාවට ජනතාව සම්බන්ධ කරගැනීම අරමුණුකරගනිමින් ඊයේ (11) මහනුවර මහයියාවේ පිහිටි ලොහාන් රත්වත්ත මහතාගේ නිවසේ දී බැසිල් රාජපක්ෂ මහතාගේ ප්‍රධානත්වයෙන් සාකච්ඡාවක් පවත්වා තිබේ.

මෙම පාද යාත්‍රාව සඳහා අතිවිශාල පිරිසක් එක්රැස්කළ යුතු බවට බැසිල් රාජපක්ෂ මහතා ඊට සහභාගිවූ ප්‍රාදේශීය දේශපාලනඥයන්ට උපදෙස් දී තිබෙන අතර ඒ සඳහා වැයවන මුදල් ලබාදීමට ද එකඟතාව පළකර ඇති බව වාර්තා වෙයි.

සම්බල්තිව්හි බෝධිය කපා විනාශ කරති

කිසියම් පිරිසක්‌ විසින් පෙරේදා (10 දා) රාත්‍රියේ ත්‍රීකුණාමලය සම්බල්තිව් ප්‍රදේශයේ පිහිටි බෞද්ධයන් විසින් වන්දනා කරනු ලබන බෝධියක්‌ කපා විනාශකර දමා බුද්ධ ප්‍රතිමා වහන්සේ වැඩසිටි බුදු කුටිය කඩා ප්‍රතිමා වහන්සේ අතුරුදන් කර ඇත.

තිරියාය වන්දනා කරන්නට යන බැතිමතුන් බොහෝ දෙනෙක්‌ මේ ස්‌ථානයට පැමිණ වන්දනා කර බෝ වෘක්‍ෂය ඔවුන්ගේ ගිමන් නිවන ස්‌ථානයක්‌ බවට පත් කරගෙන තිබිණි.

නාමල් විශේෂ සිර මැදිරියක

පොලිස් මූල්‍ය අපරාධ විමර්ශන කොට්ඨාසය මගින් අත්අඩංගුවට ගනු ලැබ අධිකරණ නියෝග මත ලබන 18 වැනිදා දක්වා රිමාන්ඩ් භාරයට පත්කළ පාර්ලිමේන්තු මන්ත්‍රී නාමල් රාජපක්ෂ මහතා කොළඹ මැගසින් බන්ධනාගාරයේ E වාට්ටුවේ විශේෂ ආරක්ෂාව යටතේ රඳවා ඇත. ඊයේ (11) සවස 6.30ට පමණ නාමල් රාජපක්ෂ මන්ත්‍රීවරයා මැගසින් බන්ධනාගාරය වෙත රැගෙන ආ අතර ඔහුව බන්ධනාගාර නාමලේඛනයේ ලියාපදිංචි කර විශේෂ සිරමැදිරියක රැඳවූ බව බන්ධනාගාර මාධ්‍ය ප්‍රකාශක, බන්ධනාගර කොමසාරිස් තුෂාර උපුල්දෙණිය මහතා පැවැසීය.

විශේෂ ආරක්ෂාව ලද සිරකරුවන් කිහිපදෙනකු සමඟ මැගසින් බන්ධනාගාර වාට්ටුවක රඳවා සිටින නාමල් රාජපක්ෂ මහතා ඊයේ (11) රාත්‍රී බන්ධනාගාර රැඳවියන්ට බන්ධනාගාරය මඟින් සපයන සුපුරුදු ආහාරවේල ලබා නොගත් බව උපුල්දෙණිය මහතා පැවැසීය.

තෙරේසා මේ බ්‍රිතාන්‍ය අගමැති පදවියට

බ්‍රිතාන්‍ය ස්වදේශ කටයුතු භාර ලේකම් තෙරේසා මේ (Theresa May)සිය අනුප්‍රාප්තිකාව හැටියට බදාදා (13) අගමැති පදවියට පත් කෙරෙන බව අගමැති ඩේවිඩ් කැමරන් නිවේදනය කළේය.

මේ අනුව තෙරේසා මේ (Theresa May)) බ්‍රිතාන්‍යයේ දෙවන අගමැතිවරිය හැටියට ඉතිහාසයට එක් වනු ඇත.

කොන්සර්වේටිව් පක්ෂ නායකත්වය සඳහා තෙරේසා මේ සමඟ තරඟ වැදුන ඇයගේ එකම ප්‍රතිවාදිනිය බවට පත්ව සිටි ඇන්ඩ්‍රියා ලීඩ්සම් (Andrea Leadsom) නායකත්ව පොරයෙන් ඉවත් වෙන බව නිවේදනය කිරීමත් සමඟ තෙරේසා එම බල අරගලයේ එකම අපේක්ෂිකාව බවට පත් වූවාය.

නාමල් මැගසින් බන්ධනාගාරයට Video

රක්ෂිත බන්ධනාගාරගත කෙරුණු පාර්ලිමේන්තු මන්ත‍්‍රී නාමල් රාජපක්ෂ මහතා මීට නොබෝ වේලාවකට පෙර වැලිකඩ මැගසින් බන්ධනාගාරය වෙත රැගෙන ආවා. ඒ, ධාරාණිපාත වර්ෂාවක් ද ඇදහැලෙමින් තිබියදීයි.

පොලිස් මූල්‍ය අපරාධ විමර්ශන කොට්ඨාසය විසින් අත්අඩංගුවට ගැනුණු පාර්ලිමේන්තු මන්ත‍්‍රී නාමල් රාජපක්ෂ මහතා ලබන 18 වෙනිදා දක්වා රක්ෂිත බන්ධනාගාරගත කිරීමට කොළඹ කොටුව මහේස්ත‍්‍රාත් අධිකරණය අද (11) නියෝග කළා.