බුදුරුව සහිත අත්වැසුම් 5424ක්‌ රේගු දැලේ

ඉන්දියාවේ සිට ශ්‍රී ලංකාව හරහා ස්‌ලෝවීනියාවට යෑවීමට සූදානම් කර තිබූ බුදුරුව සහිත අත්වැසුම් 5424 ක්‌ ඊයේ (22 දා) අත්අඩංගුවට ගැනීමට රේගුව සමත්ව තිබේ.

මෙම අත්වැසුම් හය බැගින් වූ කාටුන් 904 ක්‌ රේගු නිලධාරීන් විසින් සොයාගෙන ඇත. ඡායාරූපයේ දැක්‌වෙන්නේ බුදුරුව සහිත අත්වැසුම් රේගු නිලධාරීන්ගේ පරීක්‍ෂාවට ලක්‌වූ අයුරුයි.


ඉන්දියාවේ තූත්තුකුඩි වරායේ සිට ස්ලෝවේනියාව වෙත යැවීමට සැලසුම් කොට තිබූ මෙම භාණ්ඩ තොගය ශ්‍රී ලංකා වරායේ දී හුවමාරු කිරීමට පෙර සෝදිසි කිරීමට ලක් කෙරිණ.
ශ්‍රී ලංකාවේ පවතින නීතිය අනුව ආගමික නායකයෙකුගේ රුවක් ගෙදරදොර භාණ්ඩ වල මුද්‍රණය කිරීම තහනම් වන අතර එය දඬුවම් ලැබිය හැකි වරදක්වන බව රේගු ප්‍රකාශක ධර්මසේන කහඳව පෙන්වා දෙයි.
මේ සම්බන්ධයෙන් පරීක්ෂණයක් පවත්වා සියලු තොරතුරු අනාවරණය කර ගැනීමෙන් පසු ඉන්දීය රේගුව දැනුවත් කොට භාණ්ඩ නිෂ්පාදකයාට එරෙහිව පියවර ගත හැකි දැයි සොයා බැලීමට කටයුතු කරන බව ද ඔහු වැඩි දුරටත් කියා සිටියේය.