හිරුණිකාට පිටරට ගමන් තහනම්

දෙමටගොඩ රෙදි වෙළෙඳසලක්‌ තුළදී බලහත්කාරයෙන් තරුණයකු පැහැර ගෙන ගොස්‌ අයුතු ලෙස සිරකර තැබීම ඇතුළු අධි චෝදනා 24 ක්‌ යටතේ නීතිපතිවරයා විසින් පවරා තිබූ නඩුවේ නවවැනි විත්තිකාරිය වන පාර්ලිමේන්තු මන්ත්‍රිනි හිරුණිකා ප්‍රේමචන්ද්‍ර මහත්මිය ඇතුළු විත්තිකරුවන් 9 දෙනාට විදේශ ගතවීම වැළැක්‌වීමේ නියෝගයක්‌ පනවා ඔවුන් ඇප මත මුදා හැරීමට කොළඹ මහාධිකරණ විනිසුරු පද්මිණි කේ. රණවක ගුණතිලක මහත්මිය ඊයේ (21 වැනිදා) නියෝග කළාය.

රෝම සම්මුතියට අත්සන් කිරීම ලංකාව ප්‍රතික්‍ෂේප කරයි

ජාත්‍යන්තර අධිකරණයට අදාළ රෝම සම්මුතිය අත්සන් කරන ලෙස එක්‌සත් ජාතීන්ගේ අතුරුදන්වූවන් පිළිබඳ විමර්ශන කමිටුව කළ ඉල්ලීම ශ්‍රී ලංකා රජය ප්‍රතික්‍ෂේප කර ඇත.

මෙම රෝම සම්මුතියට ඇමරිකාව, ඉන්දියාව, චීනය, සහ රුසියාව යන රවටල්ද අත්සන් කර නැත. මෙයට පෙර එම රෝම සම්මුතියට අත්සන් කරන ලෙස ස්‌විට්‌සර්ලන්තය හා එක්‌ටෝනියාවද ශ්‍රී ලංකාවෙන් ඉල්ලා තිබුණි.

අයවැයෙන් වාහන මිල වෙනස්‌ වන්නේ නෑ

ඉදිරි වසර දෙක තුළ වාහන ආනයන බදු සංශෝධනයකට ලක් නොකරන බවට තමන් වෙත මුදල් අමාත්‍යවරයා විසින් ‍පොරොන්දුවක් ලබා දී ඇති බවත් ඒ අනුව ඉදිරි අයවැයේදී වාහන ආනයන බදු අඩු කිරීමක් හෝ වැඩි කිරීමක් සිදු නොවනු ඇති බවත් ලංකා වාහන ආනයනකරුවන්ගේ සංගමය සඳහන් කරයි.

ඊයේ (21) කොළඹ දී පැවැති මාධ්‍ය හමුවකදී අදහස් දැක්වූ ලංකා වාහන ආනයනකරුවන්ගේ සංගමයේ සභාපති සම්පත් මෙරෙංචිගේ මහතා ප්‍රකාශ කළේ එළැඹෙන නොවැම්බර් මාසයේදී ඉදිරිපත් කිරීමට නියමිත ආණ්ඩුවේ දෙවැනි අයවැය මගින් වාහන අඩු වේද වැඩි වේද යන්න පිළිබඳව මහජනතාව අතර අවිනිශ්චිත බවක් පැවතුණද මුදල් අමාත්‍ය රවී කරුණානායක මහතා තම සංගමය වෙත ලබා දුන් ‍පොරොන්දුවට අනුව මෙරට වාහන ආනයන බදු සම්බන්ධයෙන් කිසිදු වෙනස්කමක් සිදු නොවනු ඇති බව පෙන්වා දුන්නේය.

දැරියකට හදි කළ දෙදෙනා වසර 14කට පසු හිරේ

වසර දාහතරකට පෙර අවුරුදු 14ක පාසල් දැරියක ඇගේ මාපියන්ගේ භාරකාරත්වයෙන් අපහරණය කර දූෂණයට ලක් කළ බවට වරදකරුවන් වූ චුදිතයන් දෙදෙනකුට කොළඹ මහාධිකරණ විනිසුරු පද්මිණී එස්. රණවක ගුණතිලක මහත්මිය වසර 17ක හා වසර 10ක බරපතළ වැඩ සහිත සිරදඬුවම් ඊයේ (21) නියම කළාය.

නඩුවේ පළමු චුදිතට වසර 10ක බරපතළ වැඩ සහිත සිරදඬුවමක් ද තුන්වන චුදිතට වසර 17ක බරපතළ වැඩ සහිත සිරදඬුවමක් ද නියම කළ විනිසුරුතුමිය අතවරයට පත් තැනැත්තියට රුපියල් පනස් දහස බැගින් වූ වන්දි මුදල් ගෙවීමටද චුදිතයන් දෙදෙනාට නියම කළාය.

ශ්‍රී ලංකාවට ලෝකයට ආදර්ශයක් - ඔබාමා කියයි

මේ වන විට ශ්‍රී ලංකාවේ සිදුවන්නේ පරිවර්තනයක් බවත්, ශ්‍රී ලංකාව ලෝකයටම ආදර්ශයක් බවත් ඇමෙරිකානු ජනපති බැරැක් ඔබාමා තමන්ට පැවැසූ බව ජනපති මෛත්‍රීපාල සිරිසේන මහතා ඇමෙරිකාවේදී පැවැසීය. මාධ්‍ය අමතමින් ඔහු සඳහන් කළේ ශ්‍රී ලංකාවට අවශ්‍ය සහයෝගය තවදුටරත් ලබාදීමට ඇමෙරිකාව සූදානම් බව ඇමෙරිකානු ජනපතිවරයා සඳහන් කළ බවයි.

එසේම ඇමෙරිකානු වේලාවෙන් අද (21දා) සවස ජනපතිවරයා එක්සත් ජාතීන්ගේ සංවිධානය ඇමතීමට නියමිත අතර සිය කතාවේදී මත්ද්‍රව්‍ය වැළැක්වීම පිළිබඳව මෙන්ම කාලගුණ විපර්යාස පිළිබඳව අදහස් දක්වන බවද ඔහු ප්‍රකාශ කළේය.

ඉරාජ්ට බුකියෙන් කුණු බැණුම්!

ජනප්‍රිය ගායක ඉරාජ් වීරරත්නගේ නවතම මියුසික් වීඩියෝවට සමාජ ජාල ඇතුළු අන්තර්ජාල පරිශීලකයින්ගෙන් දැඩි අයහපත් ප්‍රතිචාර හිමිවෙමින් පවතිනවා.

මෙම වීඩියෝව තුළ සමලිංගික නිරුවත් දර්ශන පැවතීම ඊට හේතුව යි.

කෙසේ වෙතත් මෙම මියුසික් වීඩියෝවට හොඳ ප්‍රතිචාර ද ලැබෙමින් පවතින නමුත් අයහපත් ප්‍රතිචාර ගණන වැඩි බැවින් ඒවා නොපෙනෙන තරම් වෙනවා.

27603 කට සරසවි වරම්

නව අධ්‍යයන වර්ෂය සඳහා (2015/2016) විශ්වවිද්‍යාලවලට සිසුන් ඇතුළත් කිරීමේ අවම ඉසෙඩ් ලකුණු විශ්වවිද්‍යාල ප්‍රතිපාදන කොමිෂන් සභාව විසින් ඊයේ (20 වැනිදා) නිකුත් කරන ලදී.

මෙතෙක්‌ ඒ ඒ දිස්‌ත්‍රික්‌කයන්ගෙන් අදාළ පාඨමාලාවට ඇතුළත් වීමේ දිස්‌ත්‍රික්‌ ඉසෙඩ් ලකුණු නිකුත් කළද මෙවර ඒ ඒ දිස්‌ත්‍රික්‌කයන්ගෙන් අදාළ පාඨමාලාව පවතින විශ්වවිද්‍යාලයේ එම පාඨමාලාවට ඇතුළත් වීම සඳහා අවශ්‍ය ඉසඩ් ලකුණු නිකුත් කර තිබීම විශේෂත්වයකි. මෙම නව ක්‍රමය අනුව තමන් තේරී පත්ව ඇති විශ්වවිද්‍යාලය පහසුවෙන් දැන ගත හැකි වේ.

හිරුණිකා අද අධිකරණට

දෙමටගොඩ දී තරුණයකු පැහැරගෙන යෑම ඇතුළු අධිචෝදනා 24ක් යටතේ නීතිපතිවරයා පවරා ඇති නඩුවට පාර්ලිමේන්තු මන්ත්‍රීනී හිරුණිකා ප්‍රේමචන්ද්‍ර මහත්මිය ඇතුළු විත්තිකරුවෝ 09ක් අධිකරණය නිකුත් කළ සිතාසි මත ප්‍රථම වරට අද (21) කොළඹ මහාධිකරණය හමුවේ පෙනී සිටිති.

විත්තිකරුවනට එරෙහිව නඟා ඇති අධිචෝදනා ඔප්පු කිරීම සඳහා කුඩා දැරියක ඇතුළු සාක්කිකරුවන් 33ක්ද සී. සී. ටී. වී. කැමරා දර්ශන ඇතුළු ලේඛන 05ක්ද ඉදිරිපත් කිරීමට බලාපොරොත්තු වන බව නීතිපතිවරයා කොළඹ මහාධිකරණය වෙත දන්වා ඇත.

සජින්ට කෝටි 4ක ශරීර ඇප

මිහින් ලංකා සමාගමට බිම් මෙහෙයුම් උපකරණ ගෙන්වීමට ටී.පී.එල්. ඉන්ටර් පෞද්ගලික සමාගමට ලබාදීමෙන් අයුතු සහගත ලාභයක් ලබාගත් බව කියන අල්ලස් චෝදනාව සම්බන්ධයෙන් අධිකරණයට ඉදිරිපත් වූ හිටපු පාර්ලිමේන්තු මන්ත්‍රී සජින් වාස් ගුණවර්ධන මහතා රුපියල් 2,50,000ක මුදල් හා කෝටි 4ක ශරීර ඇපයක් මත මුදාහැරීමට කොළඹ ප්‍රධාන මහේස්ත්‍රාත් ගිහාන් පිලපිටිය මහතා ඊයේ (20) නියම කළේය.

අධිකරණ නොතීසි මත පෙනී සිටි සජින් වාස් ගුණවර්ධන මහතාගේ විදේශ ගමන් තහනම් කරමින් ඒ සම්බන්ධව ආගමන විගමන පාලකට දැනුම් දෙන ලෙසටද මහේස්ත්‍රාත්වරයා නියෝග කළේය.

පැරාලිම්පික් සූරයාට ලක්ෂ 25ක්

බ්‍රසීලයේ රියෝද ජැනයිරෝහී නිමාව දුටු පැරාලිම්පික් ක්‍රීඩා උළෙලේදී ලෝකඩ පදක්කම දිනාගත් දිනේෂ් ප්‍රියන්ත හේරත්ට රුපියල් ලක්ෂ 25ක් හා ඔහුගේ පුහුණුකරු රෝහිත බණ්ඩාර මහතාට රුපියල් ලක්ෂ 6ක් පිරිනැමෙයි.

අගමැති රනිල් වික්‍රමසිංහ මහතාගේ ප්‍රධානත්වයෙන් කොළඹ තරු පහේ හෝටලයකදී අද රාත්‍රියේ පැවැත්වෙන විශේෂ උපහාර උළෙලකදී මෙම මුදල් පරිත්‍යාග සිදු කෙරෙයි. ක්‍රීඩා අමාත්‍යාංශයෙන් ක්‍රීඩකයාට රුපියල් ලක්ෂ 15ක් හා පුහුණුකරුට රුපියල් ලක්ෂ 3.5ක්, පැරා ක්‍රීඩාවට අනුග්‍රහය දක්වන ඩයලොග් ආයතනයෙන් ක්‍රීඩකයාට රුපියල් ලක්ෂ 10ක් හා පුහුණුකරුට රුපියල් ලක්ෂ 2.5ක් පිරිනැමීමට කටයුතු යොදා තිබේ.