ජාතික ගමනාගමන කොමිසම් සභාව විසින් නිකුත් කරන ලද වලංගු මගී සේවා අවසර පත්‍ර නොමැතිව ධාවනය කරන බස්‌ රථ සඳහා දැනට නියම කරනු ලබන රුපියල් දස දහසේ අවම දඩ මුදල රුපියල් ලක්‍ෂ දෙකක අවම දඩ මුදලක්‌ දක්‌වා ඉහළ නැංවීමට කැබිනට්‌ අනුමැතිය හිමි වී ඇත.
ඊට අදාළ යෝජනාව ප්‍රවාහන ඇමැති නිමල් සිරිපාල ද සිල්වා මහතා විසින් කැබිනට්‌ මණ්‌ඩලයට ඉදිරිපත් කරනු ලැබ ඇත.
මගී බස්‌ රථ සේවයේ ගුණාත්මකභාවය වර්ධනය කිරීම සඳහාත්, නිසි අවසරයක්‌ නොමැතිව බස්‌ රථ ධාවනය කරන්නන්ට එරෙහිව නීති දැඩි කිරීමටත් මෙම යෝජනාව ඉදිරිපත් කර තිබේ.
ඒ අනුව 1991 අංක 37 දරන ජාතික ගමනා ගමන කොමිෂන් සභා පනතේ 40 වැනි වගන්තිය සංශෝධනය කිරීම සඳහා "ජාතික ගමනාගමන කොමිසන් සභා" (සංශෝධන) පනත් කෙටුම්පත පාර්ලිමේන්තුවේ අනුමැතිය සඳහා පිළියෙළ කර ඇත.