වී අලෙවි මණ්ඩලයේ ගබඩාවල තිබූ වී තොග සත්ත්ව ආහාරවලට විකුණා දැමීමත්, පසුගිය කන්නයේ වී අස්වනු පහත වැටීමත්, වී මෝල් හිමියන් විසින් වී තොග සඟවා තබා ගැනීමත් නිසා ඉදිරි කාලය තුළ සහල් මිල විශාල ලෙස වැඩිවීමේ අවදානමක් ඇතිවී තිබෙන බව සමස්ත ලංකා ගොවිජන සම්මේලනයේ කැඳවුම්කරු නාමල් කරුණාරත්න මහතා පැවසීය.
කෘෂිකර්ම අමාත්යාංශය මගින් පසුගිය කන්නයේදී වී අතිරික්තයක් ඇති බව පවසමින් අතිරේක භෝගවලට යෑම සඳහා අක්කර දෙලක්ෂ පනස් දහසකින් වී වගාව අඩුකළ බවත්, ඒ සමගම ඇතිවූ නියඟයෙන් වී වගාව විනාශ වූ බවත් පැවසූ කරුණාරත්න මහතා ඒ හරහා පෙර කන්නවල ලැබුණු වී අස්වනු රටට අහිමි වූ බවත් පැවසීය.
