සිම්බාබ්වේ අවසන් මහ තරගයට

සිම්බාබ්වේ
බටහිර ඉන්දීය කොදෙව් කණ්ඩායමේ බලාපොරොත්තු සුන් කරමින් තුන්කොන් එක්දින කි‍්‍රකට් තරගාවලියේ අවසන් මහ තරගයට සුදුසුකම් ලබා ගැනීමට සත්කාරක සිම්බාබ්වේ කණ්ඩායම අද (25) සමත් වුණා.

දෙරට අතර අද පැවති තීරණාත්මක තරගය සිම්බාබ්වේ කණ්ඩායම ජය ගත්තේ ලකුණු 5කින්. වර්ෂාවෙන් බාධා එල්ලවීම නිසා ඩක්වර්ත් සහ ලුවිස් න්‍යායට අනුව තරගයේ ජය තිරණය කෙරුණා.

ලාංකික තරුණිය තායිලන්තයේදී ගණිකාවක් කරලා

විසි හැවිරිදි ශ්‍රී ලාංකික තරුණියක පැහැරගෙන ගොස් තායිලන්තයේදී ගණිකා වෘත්තීයේ යෙදවූවා යැයි චෝදනාවක් යටතේ ශ්‍රී ලාංකිකයින් දෙදෙනෙකු එරට පොලීසිය විසින් අත්අඩංගුවට ගෙන තිබේ.

තායිලන්තයේ, පටායා නගරයේ පොලීසිය විසින් අදාළ සැකකරුවන් අත්අඩංගුවට ගෙන ඇති බව වාර්තා වෙයි.

සිල් මාතාවට අතවර කළ නරුමයා රිමාන්ඩ්

ඇඹිලිපිටිය නගරයට නුදුරින් පිහිටි අතුරු මාර්ගයක පිඬු සිඟා වඩිමින් සිටි දසසිල් මාතාවකට අතවර කිරීමේ සිද්ධියකට සැකපිට අත්අඩංගුවට ගත් පුද්ගලයකු ලබන 28 දින දක්වා රක්‍ෂිත බන්ධනාගාර ගත කරන ලෙස ඇඹිලිපිටිය මහෙස්ත්‍රාත් නිල්මිණි කේ. වීරසිංහ මහත්මිය නියෝග කළාය.

ඇඹිලිපිටිය නගරයට ආසන්නයේ පටු මාර්ගයක ඉකුත් 18 දින 43 හැවිරිදි සිල් මාතාවකට අතවර කර ප්‍රදේශයෙන් පලා ගොස් සිටි සැකකරු ඇඹිලිපිටිය ප්‍රදේශයේම පදිංචිකරුවෙකි.

දුමින්ද බැලීමට ගිය විනිසුරුවරිය අනිවාර්ය නිවාඩු

දුමින්ද
භාරත ලක්‍ෂ්මන් ඝාතන නඩුවට අදාළව මරණීය දණ්ඩනයට නියම වී සිටින හිටපු පාර්ලිමේන්තු මන්ත්‍රි දුමින්ද සිල්වා මහතා බැලීම සඳහා වැලිකඩ බන්ධනාගාරයට ගිය බවට චෝදනා එල්ල වූ කොළඹ දිසා විනිසුරු අයේෂා ආබ්දීන් මහත්මිය අනිවාර්ය නිවාඩු යැවීමට අධිකරණ සේවා කොමිෂන් සභාව කටයුතු කර තිබේ.

අදාළ සිදුවීම පිළිබඳ අධිකරණ සේවා කොමිෂන් සභාව සිදු කළ විමර්ශනයකින් පසුව කොළඹ දිසා විනිසුරු අයේෂා ආබ්දීන් මහත්මිය පිළිබඳ එම තීරණය ගෙන ඇති බව සඳහන් වේ.

දෙසැම්බර් 1වැනිදා සිට ලංකාවේම බස් වර්ජනයක

රථවාහන වැරැදි සම්බන්ධයෙන් 2017 අය - වැය ලේඛනයෙන් අවම දඩය රුපියල් 25,000ක් දක්වා ඉහළ නැංවීමට එරෙහිව දෙසැම්බර් මස 1 වැනි දින මධ්‍යම රාත්‍රියේ සිට දීප ව්‍යාප්ත වැඩ වර්ජනයක් ක්‍රියාත්මක කරන බව සමස්ත ලංකා පෞද්ගලික බස් රථ හිමියන්ගේ සම්මේලනයේ ලේකම් අංජන ප්‍රියන්ජිත් මහතා පවසයි.

බස් රථ නඩත්තු ගාස්තු ඉහළ යෑම, සැලකිය යුතු මගීන් පිරිසක් පෞද්ගලික බස් සේවාවෙන් බැහැරවීම ඇතුළු කරුණු ගණනාවක් නිසා බස් කර්මාන්තය පවත්වාගෙන යෑමට අසීරු අවස්ථාවක දරා ගැනීමට නොහැකි ලෙස මෙසේ වැඩි කරන දඩ මුදල් ගෙවීමට තම බස් රථ විකුණා දැමීමට සිදුවන බවද ලේකම්වරයා පෙන්වා දෙයි.