සිඟා කෑ මවට රු. 20 ක්‌ දඩ

සිය බාල වයස්‌කාර දියණියන් දෙදෙනා හා 6 හැවිරිදි පුත්‍රයා සමඟ කළුතර බෝ සමිඳු අබියස පසළොස්‌වක පොහෝ දින (14 දා) මහජනතාවට හා වාහනවලට අවහිර වන අයුරින් සිඟා කෑමේ චෝදනාවට වරද පිළිගත් 38 හැවිරිදි තිදරු මවකට කළුතර ප්‍රධාන මහෙස්‌ත්‍රාත් උදේෂ් රණතුංග මහතා රුපියල් 20 ක (විස්‌සක) දඩයක්‌ නියම කළේය.

මෙම කාන්තාවගේ අවුරුදු 9 ක්‌ හා 5 ක්‌ වයසැති දියණියන් දෙදෙනාද, 6 හැවිරිදි පිරිමි දරුවා ද භාර ගැනීමට ඇය හෝ සැමියා ඉදිරිපත් නොවූ හෙයින් එම දරු තිදෙනා පරිවාස භාරයේ ළමා නිවාසවල රඳවා තබන ලෙස විනිසුරුවරයා නියෝග කළේය.

කොළඹට අනිද්දා පැය 12 ක්‌ ජලය කපයි

කොළඹ ඇතුළු ප්‍රදේශ රැසක ජල සැපයුම අනිද්දා (19 වැනිදා) උදැසන 9.00 සිට රාත්‍රි 9.00 දක්‌වා පැය 12 ක කාලයක්‌ තාවකාලිකව අත්හිටුවන බව ජාතික ජල සම්පාදන හා ජලාපවහන මණ්‌ඩලය සඳහන් කරයි.

එසේ ජල සැපයුම අත්හිටුවන ප්‍රදේශ වන්නේ, කොළඹ, දෙහිවල, ගල්කිස්‌ස, කෝට්‌ටේ, කඩුවෙල මහ නගර සභා බල ප්‍රදේශ, මහරගම, බොරලැස්‌ගමුව, කොලොන්නාව නගර සභා බල ප්‍රදේශ, කොටිකාවත්ත, මුල්ලේරියාව ප්‍රාදේශීය සභා බල ප්‍රදේශ සහ රත්මලාන වේ.

ජැකලීන්ගෙන් ගිනස් ලෝක වාර්තාවක්

බොලිවුඩය වැනි දැවැන්ත සිනමා නිර්මාණ බිහිවන ක්‍ෂේත්‍රයක තරුවක් වීම සුළුපටු නැහැ. ලස්සන, සිරුරේ හැඩය, නර්තන හැකියාව වැනි එකී මෙකී නොකී දේවල් රැසකට උරුමකම් කියන අපේ රටින් බිහිවූ රූ රැජන ජැකලීන් ෆර්ඩිනැන්ඩස්, බොලිවුඩ් තාරකාවන් අතර ඉහළම තැනක දිදුලන තරුවක්.

නමුත් මේ කියන්න යන්නේ බොලිවුඩ් තරුවක් ලෙස ඇය දිනාගත් ජයග්‍රහණයක් ගැනනම් නෙවෙයි. ජැකලීන් පසුගියදාක ගිනස් ලෝක වාර්තාවකට හිමිකම් කිව්වා. ඒ ''Abdominal Plank Position' අංශයෙන්. ඇය ඒ අනුව එක් මිනිත්තුවකට Abdominal Plank Position සියයක් කිරීමට සමත් වුණා.

අම්පිටියේ සුමනරතන හිමියන්ට වාරණ නියෝගයක්

ජාතීන් අතර සංහිඳියාවට බාධාවන ආකාරයේ ප්‍රචණ්ඩ ප්‍රකාශන සිදු කිරීම සම්බන්ධයෙන් මතභේදයට ලක් වී සිටින මඩකලපුව මංගලාරාමයේ අම්පිටියේ සුමනරතන හිමියන්ට එරෙහිව එරාවුර් සංචාරක අධිකරණය විසින් වාරණ නියෝගයක් නිකුත් කරනු ලැබ ඇත.

දෙමළ ජාතිකයකුට අයත් ඉඩමකට බලහත්කාරයෙන් පිවිසීම මුල්කර ගනිමින් හටගත් මතභේදයකින් අනතුරුවයි එම වාරන නියෝගය නිකුත් කරනු ලැබ තිබෙන්නේ.

අධිවේගී මාර්ගවල අවම ගාස්තුවෙ වෙනසක්

ඉදිරියේ දී අධිවේගී මාර්ගවල රාත්‍රී 9.00 සිට අලුයම 5.00 දක්වා කාලය තුළ රියැදුරන්ට අවම ගාස්තුව ලෙස ගෙවීමට තිබූ රුපියල් සියයේ අගය රුපියල් පනහක් වන බව අධිවේගී මාර්ග මෙහෙයුම්, නඩත්තු සහ කළමනාකරණ අධ්‍යක්ෂ එස්. ඕපනායක මහතා පැවසීය. 

මෙවර අයවැය යෝජනාවලට ඉදිරිපත් වූ අධිවේගී මාර්ගවල ගාස්තු අඩුවීමේ ක්‍රියාපටිපාටියට අනුව මෙය නොබෝ දිනකින් ක්‍රියාත්මක කරන බව ද එස්. ඕපනායක මහතා සඳහන් කළේය.