දුම් පරික්ෂාවේ ප්‍රමිතියේ වෙනසක්

වාහන දුම් පරීක්ෂාවේදී තිබිය යුතු කාබන් මෙනොක්සයිඩ් වායු ප්‍රතිශතය පරිසර අමාත්‍යංශයේ උපදෙස් පරිදි 6% සිට 4% දක්වා අඩුකර ඇතැයි මෝටර් රථ ප්‍රවාහන කොමසාරිස් දෙපාර්තමේන්තුවේ වායු විමෝචන වැඩසටහනේ උසස් නිළධාරියෙකු පැවසීය.

ඒ අනුව නව ප්‍රමිතිය පසුගිය මස 15 වැනිදා සිට ක්‍රියාත්මක වන බවද ඔහු කියාසිටියේය.

කිරිහරක්‌ 20 ගානේ පවුල්වලට බෙදනවා

අවුරුද්දක්‌ ගියා තාම මොකුත් දීමට බැරි වුණා. අමතක නොවන වැඩ පිළිවෙළක්‌ ආරම්භ කරනවා. ඉවසීම තියා ගන්න. වෙච්ච පොරොන්දුව ඉටු කිරීමට බැරි නම් ඡන්දය ඉල්ලන්නේ නැතැයි විදුලි සංදේශ හා ඩිජිටල් යටිතල පහසුකම් අමාත්‍ය බදුල්ල දිස්‌ත්‍රික්‌ එජාප පාර්ලිමේන්තු මන්ත්‍රී හරීන් ප්‍රනාන්දු මහතා බදුල්ල වැලිගම හෝටලයේදී පසුගියදා සැප්. 25 දා පැවැති ජනහමුවක්‌ අමතා පැවැසීය.

අමාත්‍ය හරීන් ප්‍රනාන්දු මහතා ලංකා ජාතික වතු කම්කරු සංගමයේ සභාපති ලෙසත් පාර්ලිමේන්තු මන්ත්‍රී ඩවිවේල් සුරේෂ් මහතා මහ ලේකම් ලෙසත් පත්වීමෙන් අනතුරුව වතු ප්‍රජාව විසින් සිදුකළ පිළිගැනීම නිමිතිකොට එම ජනහමුව පවත්වන ලදී.

එජා මීළඟ මහලේකම් ඇන්ටෝනියෝ ගිටරෙස්

එක්සත් ජාතීන්ගේ සංවිධානයේ මීළඟ මහලේකම්වරයා ලෙස එහි ආරක්ෂක මණ්ඩලය විසින් පෘථිගාලයේ හිටපු අගමැති ඇන්ටෝනියෝ ගිටරෙස් මහතා ඒකමතිකව අනුමත කර තිබේ.

වත්මන් එක්සත් ජාතීන්ගේ මහ ලේකම් බෑන් කී මූන් මහතාගේ නිල කාලය මේ වසරෙන් අවසන් වීමට නියමිත අතර ඒ අනුව එළඹෙන 2017 වසරේ මුල් කාලයේ සිට ඇන්ටෝනියෝ ගිටරෙස් මහතා එම ධූරයේ කටයුතු කිරීමට නියමිතයි.

මත්තලට ආ ගුවන් යානයේ කුරුල්ලකු හැපිලා

මත්තල ගුවන්තොටුපොළට ගොඩබාමින් තිබූ ගුවන්යානයක ඉදිරි එන්ජිමේ කුරුල්ලකු හැපීමෙන් එහි ගමන් කරමින් සිටි මගීන් බස්සවා ගමන නතර කර තිබේ.

කුරුල්ලා ගැටීමෙන් ගුවන්යානයේ එන්ජිම ක්‍රියාවිරහිත වීමත් සමඟම අනෙක් එංජිමේ ක්‍රියාකාරිත්වය තුළින් නිරුපද්‍රිතව යානය ගොඩබැස්සවීමට නියමුවා සමත්විය.

ඊයේ (06දා) උදෑසන 7.15ට මත්තල ගුවන්තොටුපොළට ගොඩබාමින් තිබූ ෆ්ලයි ඩුබායි ගුවන් සමාගමකට අයත් කටුනායක සිට ඩුබායි බලා ගමන් කරන ගුවන් යානයේ මෙම කුරුල්ලා ගැටී තිබිණි. ඒ වන විට එහි ගමන් කරමින් සිටි මගීන් 43 දෙනා සහ කාර්ය මණ්ඩලයේ 07 දෙනකු ගුවන්යානයෙන් බස්සවා ගමනද නතර කර තිබේ.

ඒකාබද්ධ විපක්ෂයේ රැලිය හෙට රත්නපුරේදී

'අරගලයට පණ පොවන නව ජනතා බලවේගය' ගොඩනැඟීමේ මංගල ජන රැලිය හෙට (8දා) සවස 3ට රත්නපුර නගරයේදී පැවැත්වේ. 

හිටපු ජනාධිපති මහින්ද රාජපක්ෂ මහතාගේ ප්‍රධානත්වයෙන් පැවැත්වෙන මේ රැස්වීමේදී ඒකාබද්ධ විපක්ෂයේ අනාගත දේශපාලන ව්‍යාපාරය ගැන මහින්ද රාජපක්ෂ මහතා විශේෂ ප්‍රකාශයක් කිරීමට අපේක්ෂිතය.