වරද පිළිගනියි - නකල්ස් මස්වැද්දන් නිදහස්

සමාජ ජාල වෙබ් අඩවි ඔස්සේ මහත් ආන්දෝලනයට තුඩුදුන් නක්ලස් රක්ෂිතයේ සතුන් ඝාතනය කර එම ඡායාරූප අන්තර් ජාලයට මුදාහැරීමේ සිද්ධියට අදාළ සැකකරුවන් 06 දෙනා අධිකරණය හමුවේ වරද පිළිගෙන තිබේ.

ඒ අනුව පන්විල සංචාරක මහේස්ත්‍රාත් එම්.එච්. රෆික්ඩීන් මහතා ඔවුන්ට 175,000ක දඩයක් නියම කළ බව වාර්තාකරු සඳහන් කළේය.

ලංකාවේ 9657ක් සියදිවි නසාගෙන

ශ්‍රී ලංකාවේ ඉකුත් වසර තුනේදී සියදිවි නසාගැනීම් 9657ක් සිදුවී ඇත. එම සියදිවි නසාගැනීම් අතරේ පුරුෂයන් 7576ක් සහ ස්ත්‍රීන් 2081ක් ඇති බව සඳහන් වෙයි. ස්ත්‍රීන් 752ක් හා පුරුෂයන් 2703ක් 2013 වසරේද, ස්ත්‍රීන් 660ක් හා පුරුෂයන් 2484ක් 2014 වසරේද, ස්ත්‍රීන් 669ක් හා පුරුෂයන් 2389ක් 2015 වසරේදීද දිවි නසා ගැනීම් සිදුවී ඇත.

ඉකුත් වසර තුනේදී සිදුවූ සියදිවි නසාගැනීම් වලින් වැඩිම ප්‍රමාණය වන සියදිවි නසාගැනීම් ප්‍රමාණය වයස අවුරුදු 71න් ඉහළ සහ වයස අවුරුදු 21 - 25 අතර අය අතුරින් සිදුවී ඇත.

ප්‍රාග්ධන බද්ද යළිත්

ප්‍රාග්ධන බද්ද මේ වසරේදී යළි ක්‍රියාත්මක කරන බව අග්‍රාමාත්‍ය රනිල් වික්‍රමසිංහ මහතා ප්‍රකාශ කරයි.

වසර 3කට පමණ පෙර මේ ප්‍රාග්ධන බද්ද අය කිරීම අත්හිටුවුවද එය නැවත ක්‍රියාත්මක කිරීමට පැවැති රජය කිසිදු ක්‍රියාමාර්ගයක් නොගත් බව පිටකෝට්ටේ ජාතික සේවක සංගම් පරිශ්‍රයේදී ඊයේ (25දා) පැවැති උත්සවයකදී පැවැසුවේය. ප්‍රාග්ධන බද්ද අත්හිටුවීම නිසා කොම්පැනිකාරයන් ඇතුළු ධනපතියන්ට යහපතක් වූවා මිස වැඩ කරන ජනතාවට කිසිදු සෙතක් සිදු නොවූ බවද අග්‍රාමාත්‍යවරයා සඳහන් කෙළේය.

මාලක සිල්වාට පහර දීපු සුද්දා ලංකාවට ඇවිත්

බම්බලපිටියේ රිදම් ඇන්ඩ් බ්ලූ රාත්‍රි සමාජ ශාලාවේදී හිටපු ඇමැති මර්වින් සිල්වා මහතාගේ පුත් මාලක සිල්වාට පහර දුන් බව කියන බි්‍රතාන්‍ය ජාතික සැකකරු වසර 2 කට පසු මෙරටට පැමිණ ඊයේ (25දා) අධිකරණයට ඉදිරිපත් වූ අතර ඔහු රුපියල් ලක්ෂ 02ක ශරීර ඇප මත මුදා හරින ලෙස කොළඹ අතිරේක මහෙස්ත්‍රාත් නිශාන්ත පීරිස් මහතා ඊයේ නියෝග කෙළේය.

බි්‍රතාන්‍ය ජාතික ජේම්ස් කැසර්ලි මහතා එලෙස ඇප මත මුදා හරිනු ලැබීය.

වැරැදි හතකට ලොකු දඩයක් කයි

යතුරුපැදියක් ධාවනය කර වැරැදි හතකට වරද පිළිගත් පුද්ගලයකුට රුපියල් තිස්නවදහසක දඩ මුදලක් ගෙවන ලෙස හෙට්ටිපොළ අධිකරණ මහෙස්ත්‍රාත් රංගනී ගමගේ මහත්මිය නියෝග කළාය.

පොලිස් සංඥාවට අවනත නොවීම (රු. 2000), අපරික්‍ෂාකාරී රිය ධාවනය (රු. 10,000), ආරක්‍ෂක හිස්වැසුම් නොමැතිව රිය පැදවීම (රු. 2000), රියැදුරු බලපත්‍රයක් නොමැතිව රිය පැදවීම (රු. 3000), ආදායම් බලපත්‍රය නොමැතිව රිය පැදවීම (රු. 2000), රක්‍ෂණ සහතිකය නොමැතිව රිය පැදවීම (5000), පිටුපස අංක තහඩුව නොමැති යතුරුපැදියක් ධාවනය කිරීම (15,000) යන වැරැදි හත සඳහා එම දඩ මුදල ගෙවන ලෙස මහෙස්ත්‍රාත්වරිය නියෝග කළාය.