රගර් ක්‍රීඩක මොහොමඩ් වසීම් තාජුඩීන් ඝාතනය සිදුවූ දින රාත්‍රියේ ජනාධිපති ලේකම් කාර්යාලයේ දුරකථන භාවිතා කොට එවකට නාරාහේන්පිට පොලීසියේ ස්ථානාධිපතිවරයා ලෙස කටයුතු කළ නිලධාරියාට දුරකථන ඇමතුම් කිහිපයක් ලැබි ඇති බව අනාවරණය වී ඇති බැවින් ඒ සම්බන්ධයෙන් සූක්ෂම ලෙස විමර්ශන සිදුකරන්නේ යැයි නීතිපතිවරයා අද (03) කොළඹ අතිරේක මහේස්ත්‍රාත් මොහොමඩ් මිහාර් මහතා වෙත දැනුම් දුන්නේය.
එම ඝාතනය සිදුවූ දින ජනාධිපති ලේකම් කාර්යාලය නමින් නිකුත් කර ඇති දුරකථන තුනකින් හිටපු පොලිස් ස්ථානාධිපති ඩේමියන් පෙරේරා යන අයට දුරකථන ඇමතුම් තුනක් ලැබි ඇති බවට අනාවරණය වී ඇතැයිද නීතිපතිවරයා වෙනුවෙන් පෙනී සිටි රජයේ ජ්‍යෙෂ්ඨ අධිනීතිඥ ඩිලාන් රත්නායක මහතා එහිදී දැනුම් දුන්නේය.
එම ඝාතනය සම්බන්ධයෙන් වැඩිදුර විමර්ශන සඳහා ලබාගත් සී.සී.ටී.වී. දර්ශන කැනඩාවේ බ්‍රිටිෂ් කොලොම්බියා ආයතනය වෙත යැවීමට අවශ්‍ය සියලු පියවර ගෙන ඇතැයිද විමර්ශනවල ප්‍රගතිය සම්බන්ධයෙන් අධිකරණයට කරුණු වාර්තා කරමින් රජයේ ජ්‍යෙෂ්ඨ අධිනීතිඥ ඩිලාන් රත්නායක මහතා වැඩිදුරටත් පෙන්වා දුන්නේය.
එම නඩුව යළි ලබන 10 වැනිදා කැඳවීමට නියමිතය.